Testi i shpejtë i COVID-19 nga Roche – Merr miratimin nga FDA për përdorim emergjent në kushte shtëpie

Kompania Roche njoftoi të Premten se Administrata Amerikane e Ushqimit dhe Barnave (FDA) i ka dhënë Autorizimin e Përdorimit Emergjent për testin e saj të shpejtë të COVID-19 në shtëpi, që mund të përdoret nga njerëz deri në 14 vjeç. Testi, i cili përdor një mostër të pjesës së përparme të hundës, është “në gjendje të prodhojë rezultate të sakta, të besueshme dhe të shpejta në vetëm 20 minuta” për SARS-CoV-2 dhe të gjitha variantet shqetësuese, duke përfshirë omicron, tha prodhuesi i barnave në një deklaratë.

Varianti omicron është bërë dominant në Shtetet e Bashkuara të Amerikës me “shpejtësinë e dritës”, duke shuar shpresat për një sezon më normal pushimesh. “Roche ka kapacitetin për të prodhuar dhjetra milionë teste të shpejta në muaj dhe të ndihmojë në përgjigjen ndaj pandemisë”, njoftoi firma zvicerane, duke shtuar se testi do të jetë i disponueshëm në të gjithë Shtetet e Bashkuara, duke filluar nga janari. Miratimi vjen në një kohë kur kompani të tilla si, Walmart, Walgreens Boots Alliance dhe CVS Health Corp kanë shitje të kufizuara të testeve në shtëpi, ndërkohë që kërkesa është rritur ndjeshëm si pasojë e variantit të ri.

Presidenti amerikan, Joe Biden, së fundmi ka prezantuar planin për të blerë 500 milionë teste të shpejta, të cilat do të shpërndahen falas për amerikanët duke filluar nga janari. Testet mund të përdoren edhe për fëmijët nga 2 deri në 13 vjeç, por me mbikëqyrjen e të rriturve. Hedhja në treg do të bëhet në partneritet me kompaninë SD Biosensor, me të cilën Roche ka një marrëveshje të shpërndarjes në rang global.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.