Thirrje për mision detar europian – Britania i kërkon BE të sigurojë anijet në Gjirin e Hormuzit
Britania ka bërë thirrje për një mision detar europian, për të siguruar kalim të sigurtë për anijet në Gjirin e Hormuzit.
Apeli vjen disa ditë pasi Irani sekuestroi një anije çisternë britanike, një veprim që Londra e cilësoi si “pirateri shtetërore” në ujëra strategjike. Sekretari i Jashtëm, Jeremy Hunt nënvizoi planet në parlament pas një takimi me Komitetin Qeveritar të Emergjencave, ku diskutoi përgjigjet e Londrës ndaj kapjes së anijes çisternë, Stena Impero, nga Irani. “Sipas ligjit ndërkombëtar, Irani nuk ka të drejtë të pengojë kalimin e anijeve. Ky ishte një akt i piraterisë shtetërore”, tha Hunt në parlament.
Ai shtoi se do ti kërkojë Bashkimit Europian krijimin e një misioni mbrojtës detar, për të mbështetur kalimin e sigurtë të anijeve në këtë rajon shumë strategjik. Por, është e paqartë se sa influencë do të ketë Britania në Europë edhe për shkak të tensioneve mes tyre për shkak të Brexit. Ndërsa nga Nikaragua, ministri i jashtëm iranian akuzoi anijen britanike se po vinte në rrezik anijet e tjera duke mos kaluar në itinerarin e përcaktuar.
Aleatët kryesorë të Uashingtonit në Europë, Britania, Franca dhe Gjermania e kundërshtuan presidentin amerikan, Donald Trump, mbi vendimin e tij për tu tërhequr nga marrëveshja bërthamore mes Teheranit dhe fuqive të mëdha. Deri më tani, europianën janë përpjekur të qëndrojnë neutralë ndaj tensioneve në rritje mes Iranit dhe Shteteve të Bashkuara.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.