Thumanë-Kashar, “Gener 2” fiton tenderin për ndërtimin dhe mirëmbajtjen – Ja detajet e koncesionit
Ministria e Infrastrukturës dhe Energjisë ka shpallur kompaninë “Gener 2” si fituesen e tenderit për ndërtimin dhe mirambajtjen e rrugës Thumanë – Fushë Krujë – Vorë – Kashar.
Kompania kishte bërë edhe propozimin e pakërkuar për këtë projekt, duke marrë bonusin prej 8.5 pikësh nga qeveria shqiptare. Megjithatë, bonusi nuk ka hyrë në punë në garë, pasi ofertuesit e tjerë janë skualifikuar për shkak të vlerës më të lartë se fondi limit.
Tashmë kjo autostradë, e cila pritet të nisë punimet në shtator, do të jepet në formën e koncesionit PPP për 13 vite. Oferta e “Gener 2” paraqet një vlerë ndërtimi dhe mirëmbajtjeje prej 225.82 milionë eurosh, të cilat do të paguhen me këste nga qeveria shqiptare deri në përfundimin e afateve të kontratës.
Rruga e re do të nisë nga Thumana dhe vijon me një kthesë djathtas dhe vazhdon e drejtë në fusha deri në afërsi të Fushë-Krujës. Më pas shkon në drejtim Aeroportit të Rinasit. Gjurma e rrugës vazhdon në krahë të djathtë të rrugës automobilistike të Rinasit, deri në lidhjen e saj me Autostradën Tiranë-Durrës në Kashar.
Shpejtësia e lëvizjes do të jetë deri në 140 km/h dhe do të ketë dy karrexhata me dy korsi secila dhe nga një korsi emergjence. Rruga do të jetë e pajisur edhe me barriera akustike dhe pritet të ketë një trafik ditor prej 24-67 mijë mjetesh.
Projekti siguron një lidhje të përshtatshme mes veriut të Shqipërisë e Kosovës me Portin e Durrësit, lehtëson trafikun në segmentin Fushë Krujë-Tiranë, si dhe siguron lidhjen më të shpejtë të kryeqytetit me aeroportin.
Angelo Haruni/SCAN
(VIDEO) Si do të jetë rruga e re Thumanë-Fushë Krujë-Kashar. Rama: Shpejtësi 140 km/orë, barriera akustike, 24-67 mijë mjete në ditë
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.