Tirana 24 orë me ujë të pijshëm – “Ali Demi” përfiton i pari
Tirana ka një masterplan të ri për furnizimin me ujë të pijshëm 24 orë dhe zgjerimin e rrjetit të ujësjellësave. Ai është marrë në dorëzim ditën e djeshme nga kryetari i Bashkisë Tiranë, Erion Veliaj gjatë vizitës në Hungari me kryetarin e Bashkisë së Budapestitn István Tarlós dhe dhe Drejtorin Ekzekutiv të Kompanisë Shtetërore Publike të Ujësjellësit Csaba Haranghy.
Sipas Veliajt, ky do t’i japë zgjidhje furnizimit me ujë të pijshëm për qytetarët.
“Partneri ynë kryesor në Budapest është Kompania Shtetërore Publike e Ujësjellësit, një ndër më të mirat sot në botë. Më vjen mirë që më në fund, pas disa muajve pune, kemi një produkt konkret”, tha Veliaj.
Ndërkohë, Haranghy tha se me përfundimin e këtij masterplani, tashmë kryeqyteti mund të bëjë edhe plane veprimi të detajuara.
“Është një gjë shumë e mirë që përfunduam këtë masterplan, si një produkt të përbashkët, me të cilin do pajisim ujësjellësin e Tiranës, se si të mund të përmirësoni në kohë afatmesme shërbimin tuaj me ujë. Tashmë, mund të bëni plane veprimi të detajuara dhe mund t’i sillni bashkë me planet e investimit, kështu mund të ndërtoni projektet e nevojshme për ujësjellësin në qytetin tuaj”, tha Haranghy.
Me masterplanin e ri Tirana do të ndahet në 7 zona, dhe sipas Veliajt ndërhyrjet e para të këtij projekti do të bëhen në Shkozë, në zonën e “Ali Demit.” Ndërsa me kredinë e BERZH-it, ndërhyrjet do të nisin në zonën e Bovillës dhe Yzberishtit.
“Do të vijojmë derisa të sigurohemi që brenda 5 viteve, falë kësaj reforme dhe mbështetjes së madhe që qytetarët e Tiranës na kanë dhënë, të kemi një plan financimi të mirëfilltë për të siguruar që të kemi ujë 24 orë në Tiranë”, theksoi Veliaj.
Më tej, dy kryebashkiaket vunë theksin te forcimi i mëtejshëm i bashkëpunimit dhe marrëdhënieve mes dy qyteteve, kryesish në zhvillimin urban, kulturë dhe turizëm.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.