“Tirana Business Matching” – Në vjeshtë Shqipëria përsëri në fokus të sipërmarrjes italiane
Pas forumit të biznesit në Trieste, sipërmarrjet shqiptare dhe ato italiane do të kenë një tjetër shans për të forcuar marrëdhëniet tregtare në një tjetër takim që do të mbahet më 28 dhe 29 Shtator 2017.
Është Dhoma e Tregtisë dhe Industrisë, e cila organizon “Tirana Business Matching“, një aktivitet me qëllimin për të mbledhur kompani lider, si dhe përgjegjësit politikë e ekonomikë të dy vendeve, sipërmarrës, inovatorë dhe ekspertë në një program thellimi dy ditor.
Në këtë forum biznesi do të marrin pjesë investitorë nga një numër i madh vendesh si: Italia, Emiratet e Bashkuara Arabe, Turqia, Austria, Greqia, Gjermania, Kosova, Maqedonia, vendet e Benelux-it, Kroacia, vendet nordike dhe Zvicra.
Energjia do të jetë një nga fushat më prioritare, me mundësinë e investitorëve të huaj të ofrojnë makineri dhe konsulencë në këtë fushë. Ndërsa me rëndësi po ashtu do të shihen mundësitë që lindin për bizneset nga ndërtimi i gazsjellësit TAP, si edhe pasuria nëntokësore e vendit.
Në njoftimin e publikuar për mediat italiane, theksohen reformat e ndërmarra nga Shqipëria në kuadër të procesit të integrimit europian, të cilat ofrojnë më shumë siguri ligjore për investimet e huaja.
“Pranë Italisë është një urë natyrale drejt Ballkanit dhe Europës Lindore, Shqipëria, e cila ka një ekonomi në rritje të vazhdueshme, një treg pune të ri, dinamik dhe shumë më pak të kushtueshëm se në vendet e tjera të zhvilluara. Në përgjithësi, një ndërmarrje italiane do të kishte shumë avantazhe si një forcë pune të kualifikuar, taksa që shkojnë nga 7,5% deri në 15%, koston e krahut të punës ndër më të lirat në Europën Lindore, nivel edukimi mbi mesataren e BE, gjuha italiane është e folur nga një pjesë e mirë e popullsisë, subvencione për investime në sektorë strategjikë, e shumë të tjera”, shprehet Roberto Laera, administratori i “Italian Network”
Të tilla motivime tregojnë qartë arsyen e pjesëmarrjes së ndërmarrjeve italiane në “Tirana Business Matching”, një shans për ndërkombëtarizim që përfaqëson një çelës suksesi për bizneset në një moment kritik të ekonomisë italiane.
Fushat kryesore ku do të përqendrohen takimet e bizneseve janë:
- Infrastruktura
- Turizmi
- Agroushqimi dhe Agrikultura
- Inovacioni & Teknologjia
- Energjia
- Investimet/Financimi
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.