“Tirana-dy vjet zgjuar” – Veliaj: Më e mira për Tiranën s’ka ardhur akoma
Bashkia e Tiranës ka bërë 800 punë në 800 ditë për kryeqytetin, por më e mira për Tiranën ende s’ka ardhur .
Kështu ka deklaruar kreu i bashkisë Erion Veliaj në mbyllje të turit “Tirana-dy vjet zgjuar”. Veliaj zhvilloi analizën e punës së bërë, ndërsa theksoi se në pjesën e parë të mandatit të tij është bërë e mundur që çdo ditë të mbyllet me një punë të përfunduar.
“Këto 2 vjet, në Bashkinë e Tiranës kemi pasur një moto: Nuk perëndon dielli në Tiranë pa bërë një punë konkrete. Deri më sot kemi përfunduar në total 800 punë publike në 800 ditët e administratës tonë në Bashkinë e Tiranës. Besoj se nëse do vijojmë edhe dy vitet e ardhshme me të njëjtin motivim, pra duke ardhur në mëngjes si të ishte dita e parë e punës e duke ikur në darkë si të ishte dita e fundit, besoj se për Tiranën do të ketë veç ditë të mira”, u shpreh Veliaj.
Kryebashkiaku bëri të ditur se përveç rikonstruksionit të disa shkollave për nxënësit e Tiranës, në shtator do të hapen tre shkolla të reja sipas të cilit do ulin të gjithë trysninë dhe presionin që kanë disa si “Shkolla e Kuqe”.
“Në Shtator do të hapim 3 shkolla të reja: shkollën “Betim Muço” në Kombinat me 27 klasa, 3 laboratorë dhe 4 fusha sportive, që i shërbejnë të gjithë komunitetit; shkollën e re “Hoxha Tahsin”, e cila ul të gjithë trysninë dhe presionin që kemi te “Shkolla e Kuqe”, duke qenë se kemi trefishuar kapacitetin; dhe shkolla e re “Ardian Klosi” te Bregu i Lumit, ku jo vetëm janë transformuar shumë lagje, që sot nuk dallohen nëse janë te Bregu i Lumit apo në një zonë periferike të Tiranës, sepse veç kompleksit shkollor është edhe kompleks sportiv, me çerdhe, kopësht e qendër sociale”, tha Veliaj.
Veliaj theksoi se pavarësisht se shërbimi i transportit publik nuk është ende në nivelin e duhur, Revolucioni i vërtetë do të ndodhë në pjesën e dytë të mandatit si kryebashkiak.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.