“Tirana Parking”: Ja në cilat rrugë mund të parkoni pa pagesë gjatë gjithë javës
Të gjithë qytetarët, përdorues të vendparkimeve publike tashmë do të mund të përdorin rrugët me sistem tarifimi pa pagesë.
Sipas njoftimit të Agjencisë “Tirana Parking”, të gjitha rrugët që janë me vijëzime blu me të bardhë mund t’i shfrytëzoni pa pagesë çdo ditë nga e Hëna në të Premte.
Kjo vlen vetëm në rastet e përdorimit të përcaktuara nga “Tirana Parking”, konkretisht prej orës 20:00 – 07:30 si dhe gjatë ditëve të fundjavës.
Jashtë këtij orari, nëse përdorni këto rrugë për të parkuar automjetet, duhet që të dërgoni targën e mjetit tuaj me SMS në numrin 50500, e cila kushton 100 lekë dhe përmes saj ju paguani një orë parkimi.
Ndërkohë, vetëm disa ditë më parë “Tirana Parking” publikoi edhe listën me 10 rrugë të Zonës B në kryeqytet që iu shtuan listës së rrugëve ku parkohet me pagesë, me një tarifim 1 orë/40 lekë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.