Tirana, qendër ekonomike – 8800 sipërmarrës kanë një biznes të dytë
Kryeqyteti është më i lakmuari ndër qytetet e tjera për të zhvilluar biznes, kjo për shkak të numrit të lartë të popullsisë, i cili ka ardhur në rritje të përvitshme, të përqendrimit të shërbimeve dhe institucioneve shtetërore.
Në 24 njësitë administrative të Tiranës zhvillojnë aktivitetin 46.895 subjekte kryesore, ku 11 ish-njësitë e vjetra, kanë edhe përqendrimin më të lartë.
Por ajo që vihet re është shifra e lartë edhe e bizneseve sekondare, pra që janë në pronësi të individëve që e kanë një biznes kryesor.
Sipas të dhënave nga Drejtoria e Përgjithshme e Taksave dhe Tarifave Vendore për vitin 2016, në të 24 njësitë administrative të Tiranës zhvillojnë aktivitetin ekonomik 8809 subjekte sekondare, ku mesatarisht rezulton që rreth 8800 sipërmarrës kanë një biznes të dytë.
Kategoria e parë në renditje janë dyqanet e shitjes me pakicë, me 3337 subjekte, të ndjekur nga “shitje me shumicë”, njësitë e shërbimit, si hotelet, baret, restorantet, subjekte në sektorin e transportit, etj.
Ashtu sikurse për bizneset kryesore, edhe për ato sekondare, zonat në zhvillim të Tiranës janë më tërheqëse. Vetëm në Kashar janë pozicionuar 514 subjekte dytësore, e ndjekur nga Farka me 182 subjekte, Vaqarri 106 subjekte, më tej Dajti me 99 subjekte sekondare në total. Numrin më të ulët në këtë drejtim e regjistron Shën Gjergji dhe Zall Bastari, me vetëm 2 subjekte dytësore.
Bashkia e Tiranës, së fundmi, i ka kushtuar vëmendje veçanërisht investimeve në periferi dhe nxitjes së bizneseve për të zhvilluar aktivitetet e tyre në këto zona, me qëllim zhvillimin e tyre ekonomik.
11 ish-njësitë | 7089 subjekte |
Kashar | 514 subjekte |
Farkë | 182 subjekte |
Vaqarr | 106 subjekte |
Dajt | 99 subjekte |
Petrelë | 29 subjekte |
Pezë | 21 subjekte |
Zall Herr | 12 subjekte |
Bërzhitë | 11 subjekte |
Ndroq | 9 subjekte |
Baldushk | 8 subjekte |
Krrabë | 5 subjekte |
Shën Gjergj | 2 subjekte |
Zall Bastar | 2 subjekte |
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.