Tiranë e bregdet, qindra prona të krimit me qira – Agjencia e Administrimit të Pasurive të Sekuestruara publikon listën me 312 pasuri

Nga apartamente, vila, dyqane, garazhe, deri fshatra turistikë, toka arë apo pemishte: janë 312 prona në zotërim të Agjencisë së Administrimit të Pasurive të Sekuestruara e të Konfiskuara të cilat parashikohen të jepen me qira për llogari të shtetit. Scan Televizion ka zbardhur listën me prona të Agjencisë, të cilat, me ligjin e ri, mund të jepen me qira edhe pa statusin përfundimtar të konfiskimit.

Bie në sy se disa prej pronave gjenden në zona mjaft të kërkuara të bregdetit, ndërkohë që nuk mungojnë as ato në Kryeqytet, madje edhe në disa prej zonave luksoze në qendër apo periferi të Tiranës. Nuk mungojnë as njësitë tregtare madje edhe biznese. Lista përmban vendndodhjen e pasurive si dhe statusin ligjor, e sekuestruar apo e konfiskuar.

Për t’u shënuar është se Agjencia e Administrimit të Pasurive të Sekuestruara dhe të Konfiskuara ka qenë veçanërisht e ngarkuar gjatë vitit të shkuar. Në qershor të vitit 2021 arrin në total 54 milionë euro vlera e aseteve të luajtshme e të paluajtshme të bllokuara për llogari të Agjencisë. Deri më 1 qershor të këtij viti, 20 milionë euro pasuri u konfiskuan përfundimisht, ndërkohë që 24 milionë euro të tjera ishte revokuar masa e sekuestros.

Por ka qenë viti 2020 më i ngarkuari për sa i përket pasurive të krimit, për shkak të Operacionit Forca e Ligjit. Bëhet fjalë kryesisht për pasuri të përfituara nga aktivitetet kriminale. Mes tyre gjendet toka, ara, apartamente, biznese, deri edhe hotele me vlera të konsiderueshme monetare.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.