Tjetër kredi për Tiranë-Elbasan/Keqmenaxhimi, Gjiknuri: Kostot u rritën 44%, mund të tarifohet
Komisioni Parlamentar i Ekonomisë ka miratuar projektligjin që i ndez dritën jeshiles marrjes së një huaje të re prej 16 milionë dollarësh për përfundimin e Rrugës Tiranë Elbasan.
I pranishëm në Komision, Ministri i Infrastrukturës dhe Energjisë Damian Gjiknuri shpjegoi se huaja e mëparshme prej 35 milionë eurosh ishte e pamjaftueshme për të përfunduar punimet.
Në këtë mënyrë, kostoja e Rrugës Tiranë Elbasan rritet me 44%, duke shkuar nga 312 milionë dollarë në projektin fillestar, në 450 milionë dollarë.
Kostot jashtëzakonisht të fryra për këtë rrugë u vunë në shënjestër të kritikave nga deputetët e komisionit.
Kreu i Komisionit Erion Braçe kërkoi përshpejtimin e hetimeve nga prokuroria për të zbardhur shkaktarët e këtyre kostove, ndërkohë që relatorja e draftit Evis Kushi kërkoi informacion mbi afatet e përfundimit të rrugës, garanci nëse kjo do ishte huaja e fundit për këtë rrugë, si dhe nëse do mirëmbahej nga buxheti apo do jepej me koncesion.
Gjiknuri shpjegoi se rruga do të përfundojë brenda këtij viti, për këtë kërkoi proceduar të përshpejtuar miratimi, duke anashkaluar afatin dy javor nga publikimi në Fletoren Zyrtare.
Lidhur me pyetjen nëse rruga do të bëhet me pagesë, Gjiknuri tha se Buxheti i Shtetit e ka të pamundur të mbulojë kostot e mirëmbajtjes, gjë që e bën të domosdoshme tarifimin e disa segmenteve në vend.
Kreu i Komisionit Erjon Braçe tha se Kuvendi do komunikojë me Presidentin, në mënyrë që kredia të lëvrohet në kohë rekord dhe punimet të nisin përpara stinës së shirave.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.