Tjetër reformë në energji – ‘Berlini’, Rama me Sekretariatin: Lidhje me tregjet fqinje 

Qeveria ‘Rama 2’ në bashkëpunim me Sekretariatin e Komunitetit të Energjisë do të ndërmarrë një sërë iniciativash për të mundësuar shkëmbimin e energjisë dhe për të hapur më tej tregun e brendshëm.

Gjithçka është dakordësuar në një takim të zhvilluar pak ditë më parë në Tiranë mes kryeministrit, Edi Rama, ministrit të Energjisë dhe Industrisë, Damian Gjiknuri, si dhe drejtorit e nëndrejtorit të këtij organizmi, ku në fokus të diskutimeve ishte vazhdimi i reformës në sektorin e energjisë në vendin tonë.

Sipas njoftimit të publikuar, vetë Sekretariati e cilësoi si një javë të mirë, pas krijimit të qeverisë së re të Shqipërisë, ndërsa thekson se masat e reja që pritet të ndërmerren në sektorin energjetik do të përfshijnë edhe lidhjen me tregjet fqinjë në kuadër të procesit të Berlinit.

Përveç kësaj, sipas Sekretariatit, Shqipëria është e përgatitur të marrë një rol udhëheqës në aktivitetet e Komunitetit të Energjisë në lidhje me integrimin e politikës së energjisë dhe klimës. Ndërkohë që, kryeministri Rama ka shprehur mbështetjen e plotë për procesin e vazhdueshëm të forcimit të Komunitetit të Energjisë duke ndryshuar traktatin aktual.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.