Tkurret aktiviteti në Eurozonë. Bizneset goditen nga karantina, rritet optimizmi për vitin e ardhshëm

Aktiviteti i biznesit në Eurozonë është tkurrur ndjeshëm muajin e kaluar, ndërkohë që qeveritë në bllok kanë rivendosur masa të karantinës për të frenuar valën e dytë të koronavirusit.  Ekonomia e bllokut do të tkurret përsëri këtë tremujor, sipas analistëve, por shpresa e një vaksine dhe stimujve nga Banka Qendrore Europiane, kanë rritur optimizmin për vitin e ardhshëm.  Indeksi PMI, që shihet si një tregues i mirë i gjendjes ekonomike, u tkurr në 45.3 pikë në Nëntor, nga 50 që ishte në Tetor.  Ndërkohë që qendrat e mikpritjes janë detyruar të mbyllen dhe qytetarët janë inkurajuar të qëndrojnë në shtëpi, kërkesa ka rënë.

Karantina e dytë në Gjermani, ka zhytur sektorin e shërbimeve më tej në recesion, duke ndaluar rritjen e sektorit të përgjithshëm privat, në ekonominë më të madhe të Europës.  Aktiviteti i biznesit në Francë është tërhequr gjithashtu, prej goditjes së rëndë tek sektori i shërbimeve. Industria e shërbimeve në Itali, është tkurrur për të katërtin muaj radhazi dhe Spanja, ekonomia e katërt më e madhe, pësoi rënie përsëri.  Megjithatë, optimizmi mbi vitin e ardhshëm është përmirësuar, dhe indeksi që parashikon prodhimin në të ardhmen në Eurozonë, u rrit në 60.4 pikë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.