Tkurret ekonomia franceze/ Bie me 0.1% në tremujorin e katërt prej konsumit dhe investimeve
Ekonomia franceze u tkurr papritmas në tremujorin e fundit të vitit të kaluar, ndërkohë që shpenzimet konsumatore dhe invesimet e bizneseve u ngadalësuan. Tkurrja e papritur përbën një goditje për presidentin Emmanuel Macron që deri më tani ka përmendur rritjen ekonomike dhe krijimin e vendeve të punës si justifikim për axhendën e tij pro-biznesit.
Agjencia e Statistikave bëri të ditur se ekonomia e dytë më e madhe e Eurozonës u tkurr me 0.1% në tremujorin e fundit 2019, pas një rritjeje me 0.3% në të tretin. Performanca e dobët në fund të vitit theu projeksionet e analistëve, që flisnin për një rritje me 0.2%.
Agjencia e Statistiakve tregoi se shpenzimet për konsum u ngadalësuan në 0.2% gjatë tremujorit, pavarësisht masave të vitit të kaluar për të nxitur fuqinë blerëse të familjeve. Ndërkohë, investimet e bizneseve u ngadalësuan në 0.3% nga 1.6% rritje në tremujorin e tretë. Në total, kërkesa e brendshme kontribuoi me një rritje prej 0.3% tek treguesi përfundmitar.
Megjithatë, kjo u fshi nga një ndikim me -0.4% nga tkurrja e inventarëve nga kompanitë. Tregtia neto nuk ndikoi tek treguesi përfundimtar. Performanca në fund të vitit tregon se ekonomia është rritur me 1.2% për 2019-ën, që është brenda projeksioneve të Qeverisë, pavarësisht tkurrjes në tremujorin e katërt.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.