Trafiku i rënduar në zonat turistike, policia jep 5 këshilla për drejtuesit e makinave dhe motorëve

Zonat turistike po përballen me një trafik të shtuar e për këtë qëllim, forcat e policisë janë mobilizuar për të normalizuar trafikun. Krahas manaxhimit të fluksit të lëvizjeve përmes devijimit të disa kategorive të automjeteve nga akset e zonave turistike e radarëve automatikë që evidentojnë drejtuesit e mjeteve që tejkalojnë limitet dhe normat e shpejtësisë të lejuara.

Radarët e automatizuar monitorojnë akset :Tiranë – Elbasan, Durrës – Kavajë, Maminas – Gjiri i Lalëzit, Milot – Mirditë, Milot – Lezhë dhe akset Elbasan Peqin, Elbasan – Librazhd, Fier – Vlorë, Fier –Tepelenë.

Ndërkohë, për ditët e fundjavës policia këshillon drejtuesit e mjeteve:

1. Përdorimi i rripit të sigurimit dhe kaskos shpëton jetën në rast përfshirje në aksidente rrugore
2. Përdorimi i alkoolit është “telash” i pandreqshëm për drejtuesit e mjeteve në rast se konstatohet nga shërbimet e policisë rrugore. Minimumi është pezullimi i lejedrejtimit dhe maximumi është ndjekje penale për ata që konstatohen në gjendje të dehur
3. Qarkullimi me shpejtësi të moderuar dhe brenda normave të lejuara të shpejtësisë. Radarët janë në gatishmëri dhe deri tani janë pezulluar rreth 40 lejedrejtimi për “pilotët” e rrugëve, ndërkohë që janë vendosur 67 masa administrative për tejkalim të shpejtësisë deri në 20km/orë me shumë se normat e lejuara ose se sistemi i sinjalizimit
4. Drejtuesit e mjeteve që kanë udhëtuar mbrëmë natën sot duhet të bëjnë kujdes të pushojnë dhe të jenë të shplodhur në timon: lodhja dhe pagjumësia shpeshherë ka qenë shkak për aksidentet rrugore
5. Parakalimet e gabuara përveçse janë shkak kryesor për aksidentet rrugore, në momentin e konstatimit nga Policia rrugore mund të jenë një gjobë e kripur për drejtuesit e “paduruar” të mjeteve. Në mjaft raste kjo masë shoqërohet edhe me pezullim të lejedrejtimit. Deri tani janë vendosur mbi 1500 masa administrative për këtë shkelje dhe janë pezulluar mbi 100 leje drejtimi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.