Tragjedia e zjarrit në Greqi, ministria e Jashtme e Shqipërisë jep informacion zyrtar për shqiptarët e prekur! Reagimet

Ministri i Jashtëm Ditmir Bushati ka shprehur solidaritet me ngjarjen tragjike që ka ndodhur në Greqi ku si pasojë e zjarreve në periferi të Athinës të paktën 60 persona kanë humbur jetën dhe mbi 150 janë plagosur.

“Në këtë moment të vështirë ne jemi pranë fqinjit tonë, Greqisë dhe shprehim ngushëllimet tona për familjarët e viktimave. I urojmë shërim të shpejtë të prekurve nga kjo tragjedi. Ambasada e Republikës së Shqipërisë në Greqi është në kontakt të vazhdueshëm me autoritetet greke dhe qytetarët shqiptarë të zonave të prekura” shkruan Bushati në reagimin e tij.

Sa i përket shtetasve shqiptarë, Bushati bën me dije se “deri në këto momente raportohet vetëm një shtetas shqiptar që ndodhet në spital jashtë rrezikut për jetën”.

Ndërsa kreu i Partisë Demokratike Lulzim Basha në deklaratën e tij u shpreh ngushëllime për familjet e viktimave!

“Lutemi që drama të ndalet këtu e të mos rritet më shumë! Qeveria shqiptare duhet të ofrojë menjëherë çdo ndihmë të mundshme në solidaritet me fqinjët tanë, por edhe në shenjë përgjegjësie ndaj bashkatdhetarëve tanë në Greqi! Në këto orë të vështira mendimet dhe lutjet e mia janë për të mbijetuarit, të lënduarit dhe të afërmit e tyre” shkruhet në reagimin e Bashës.

Për më shumë lexo edhe: http://www.scan-tv.com/athina-perpihet-nga-flaket-te-pakten-60-persona-humben-jeten-duke-u-larguar-drejt-detit/

SCAN

​

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.