Trajtimi i ujërave të ndotur, 1 qershori ultimatum – Klosi: Revokojmë lejet për subjektet që s’kanë impiant
Data 1 Qershor 2018 është afati i fundit për subjektet që nuk trajtojnë ujërat e ndotura për të vendosur sistemet e depurimit. Llogaritet që numri i këtyre të subjekteve të jetë rreth 800 kompani, të cilat në formularët e deklarimit deklarojnë të kundërtën, pra trajtimin e ujit 100%.
Ministri i Mjedisit dhe Turizmit, Blendi Klosi, shprehu edhe njëherë ultimatumin, i cili përkon me hapjen zyrtare të sezonit turistik, pas të cilit do të nisë revokimi i lejeve mjedisore të të gjithë përdoruesve të ujit.
“U ribëj edhe një herë thirrje të gjithë subjekteve që në rastin konkret për të cilin po diskutojmë kemi trajtimin e ujërave të zeza, janë në kohë që të fillojnë të studiojnë, të gjejnë një zgjidhje të tyre brenda kushteve të cilat ata zhvillojnë aktivitetin, brenda mundësive financiare dhe kapaciteteve të tyre të zhvillimit por në asnjë rast nuk do të lejohen që të derdhin më ujërat e zeza në lumenj apo ne ujërat e zeza në det. Bëhet fjalë për subjekte tashmë që janë individualë, që janë të shkëputura që nuk janë pjesë e një komuniteti të caktuar dhe depozitimi i ujërave të zeza vazhdon të jetë lumi apo deti”, u shpreh Klosi.
Deklarata u bë gjatë tryezës shkencore me ekspertë të huaj, të cilët sollën disa nga modelet europiane të trajtimit të ujit të ndotura. Klosi u shpreh i hapur ndaj këtyre modeleve me standarte të larta duke u kërkuar të gjitha bizneseve që të gjejnë sa më shpejt zgjidhjen.
Ministri u shpreh gjithashtu se aksioni për pastrimin e Shqipërisë do të vijojë me pastrimin e shtretërve të lumenjve dhe bregdetit duke kulmuar në ditën e Tokës më 22 prill.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.