Trajtimi i varfërisë nga Kina, Banka Botërore: Duhet ndjekur modeli i segmentuar kinez
Ndërkohë që ekonomia kineze ka patur një rritje të fortë në 3 dekadat e fundit, një nga arritjet më të dukshme ka qenë nxjerrja e miliona njerëzve nga varfëria.
Ekspertët në Forumin Ndërkombëtar të Kinës mbi Reduktimin e Varfërisë, vunë në dukje përpjekjet e vendit, duke theksuar se përbëjnë një model për vendet e tjera.
Vetëm për 2016-ën, më shumë se 12.4 milionë banorë të zonave rurale kanë dalë nga varfëria, duke tejkaluar objektivat e Qeverisë për 10 milionë njerëz.
Zyrtarët e Bankës Botërore deklaruan se një nga arsyet për këto arritje mbresëlënëse është shënjestrimi i segmenteve specifikë të të varfërve.
Edhe pse Kina ka bërë progres të jashtëzakonshëm, transmetimi i këtij suksesi në vende të tjera kërkon shumë punë. Organizata ndërkombëtare si Banka Botërore dhe Banka Aziatike për Zhvillim, kanë bërë të ditur se do të ndihmojnë me shpërndarjen e eksperiencës kineze në vende të tjera.
Analistët thonë se disa vende duhet të ndjekin metodën kineze, duke ndërtuar fillimisht kapacitetin e më pas të ndjekin alternativa që sjellin progres në nivele të ndryshme, përpara se të shënjestrojnë individët.
“Nëse ka burime të limituara, atëherë duhen shënjestruar zonat me nivel të lartë të varfërisë, duke operuar në nivele provincialë. Ndërkohë që ndërtohet kapaciteti, shënjestrohen fshatrat dhe ndërsa bëhet progres në këto zona, atëherë vendosen prioritet individët”, deklaron drejtori për Kinën i Bankës Aziatike për Zhvillim, Benedict Bingham.
Raportet tregojnë se më shumë se 700 milionë njerëz në të gjithë botën vazhdojnë të jetojnë në varfëri ekstreme. Organizata e Kombeve të Bashkuara a caktuar si objektiv që të zhdukë varfërinë në të gjitha format deri në 2030-ën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.