Transaksionet energjetike, KESH shpenzoi 12 milionë euro më pak në 2016

Situata e mirë hidrike dhe menaxhimi i kasakdës së Drinit është përkthyer për Korporatën Elektroenergjitike Shqiptare, në një bilanc pozitiv sa i përket transaksioneve energjetike. Të dhënat e fundit të vitit 2016, tregojnë se, KESH ka shpenzuar 12 milionë euro më pak për blerje energjie nga importi, krahasuar me vitin 2015.

Krahasuar me mesataren e 5 viteve të fundit janë 34 milionë euro më pak të shpenzuara. Nga ana tjetër, gjatë prurjeve masive, KESH prodhoi me kapacitete maksimale, duke rritur ndjeshëm eksportet. Referuar të dhënave të raportuara nga KESH, të ardhurat u rritën me 22 milionë euro gjatë vitit 2016 përmes eksportit, nëse krahasimin e bëjmë me vitin 2015.

Ndërsa, krahasuar me mesataren e 5 viteve të fundit, të ardhurat u rritën me 41 milionë euro. Situata pozitive e bilancit të të ardhurave ka ndikuar edhe tek borxhet e KESH, që raportohet të jetë të paktën, për vitin 2016, në zero borxhe të reja dhe shlyerje në kohë të kredive.

Huatë afatshkurtra të administruara në vitin e kaluar janë në vlerën 11 milionë euro.

Nertila Maho/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.