Transfertat bankare jashtë – Individët nxorën 460 milionë euro vitin e kaluar
Individët shqiptarë transferuan jashtë vendit 57 miliardë lekë ose rreth 460 milionë euro nga llogaritë e tyre bankare për vitin e kaluar. Statistikat e Bankës së Shqipërisë tregojnë se këto transferta në vitet e fundit kanë pësuar rënie të ndjeshme në vlerë, me 30% më pak krahasuar me vitin 2017.
Kjo shumë përmbledh të gjitha pagesat e nisura nga llogaritë individuale drejt llogarive bankare jashtë vendit, duke përfshirë këtu edhe pagesat me kartë për blerje mallrash apo shërbimesh nëpërmjet internetit.
Rënia e vlerës së transfertave, që shprehet në lekë, lidhet edhe me mbi çmimin e lekut ndaj valutave të tjera dhe sidomos kundrejt euros; por, ky mbiçmim që ka arritur gjithsej në rreth 13% e shpjegon vetëm pjesërisht rënien e vlerës së transfertave ndërkombëtare.
Në mënyrë paradoksale, ndërsa vlera e transfertave jashtë vendit ka rënë për të dytin vit radhazi, numri i transfertave vazhdon të rritet dhe për vitin e kaluar arriti në 1.64 milionë, 30% më shumë krahasuar me vitin 2017.
Shpjegimi më logjik i kësaj tendence mund të jetë fakti që rritja e numrit të transfertave lidhet kryesisht me shumat e vogla, kryesisht për blerje mallrash nëpërmjet internetit, ndërsa ka një rënie të transfertave të parave jashtë vendit në shuma më të mëdha.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.