Transparenca e “shtetit” – Shqipëria listohet e katërta në rajon
Shqipëria renditet e katërta në rajon sa i përket performancës në qeverisjen e hapur. Në vëzhgimin e kryer në 275 institucione për periudhën dhjetor 2017- shkurt 2018 nga Lëvizja Mjaft rezulton se transparenca është një nga komponentë më të parealizuar.
Në këtë kuadër kemi mungesë të transparencës sa i përket buxhetit, borxhit publik dhe parashikimi i prokurimeve publike.
Monitorimi është kryer mbi Ministritë e Linjës, Zyrën e Kryeministrit dhe Agjencitë Ekzekutive për transparencën, aksesueshmërinë, integritetin dhe efektshmërinë.
Sa i përket performancës së ministrive të linjës, Shqipëria përsëri rendite e katërta në rajon me 42 për qind të realizimeve. Ndërsa referuar agjencive ekzekutive ajo që bie në sy, është fakti se Shqipëria rendite e parafundit në rajon me 21 për qind të realizimeve.
Agjencia e Mbikëqyrjes së Falimentit, Agjencia Rajonale e Sistemit Shëndetësor dhe Agjencia Kombëtare e të Ardhurave nuk i respektojnë parimet e mirëqeverisjes, me 0 % hapje institucionale.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.