Transporti ajror, 2.6 milionë pasagjerë në vitin 2017 – 2 mijë fluturime më shumë se në 2016
Linjat ajrore kanë dominuar transportin e udhëtarëve gjatë muajit vitit 2017, duke iu gëzuar një rritjeje vjetore prej plot 19.8% në numrin e pasagjerëve krahasuar me vitin 2016. Referuar të dhënave të Institutit të Statistikave, numri i personave që kanë përdorur këtë formë transporti është 2.630.338 individë.
Tashmë transporti ajror i pasagjerëve zë 62,6 % të transportit në total. Sa i takon të dhënave vetëm për muajin Dhjetor, sërish ka një performancë pozitive në shifrat e pasagjerëve, duke u rritur me 6.3%.
Gjatë gjithë vitit në aeroportin e vetëm ndërkombëtar në vend, atë “Nënë Tereza” në Rinas, kanë operuar 17 linja ajrore, 2 më shumë se në 2016. Me shtimin e paralajmëruar të kompanive të fluturimit që kryejnë fluturime drejt vendit tonë dhe falë perspektivës së zhvillimit të mëtejshëm të aviacionit civil në vend falë projektit të aeroportit të Vlorës dhe krijimit të një linje ajrore kombëtare, shtimi i mëtejshëm i pasagjerëve është i sigurt si në termat afatshkurtër dhe ato afatgjatë.
Ndërkohë, transporti i pasagjerëve me rrugë detare ka shënuar rënie me 10.5%, krahasuar me Dhjetorin e vitit 2016. 75.117 persona i kanë përdorur tragetet si mjet transporti gjatë muajit të kaluar. Megjithatë, për të gjithë vitin, edhe kjo formë transporti ka shënuar një rritje të konsiderueshme pasagjerësh me 16,9%. Mbi 1.5 milionë udhëtarët me det i atribuohen pjesërisht edhe shtimit të turistëve italianë në Shqipëri.
Sa i takon transportit me hekurudhë, ky i fundit ka shënuar një rënie me 25% krahasuar me vitin 2016. Numri i personave që kanë përdorur rrjetin hekurudhor është 65.980, nga 88.690. Sipas ekspertëve, rënia është e lidhur ngushtë me zhvendosjen e stacionit të trenit në Kashar. Por me projektin për rehabilitimin e linjës Tiranë-Durrës dhe krijimin e një lidhjeje me Rinasin, si edhe me rikthimin e stacionit brenda kryeqytetit në vendndodhjen historike, pritet që numri i udhëtarëve që përdorin këtë formë transporti të kthehet në rritje.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.