Transporti ajror, Rinasi i treti në Ballkan për nga rritja – Shkupi shtoi gati 80 mijë pasagjerë në tre muaj
Shqipëria mund të ketë regjistruar një rritje prej 52 mijë udhëtarësh në transportin ajror gjatë tre muajve të parë të këtij viti, por kjo është një shifër e pamjaftueshme për të konkurruar performancën e aeroporteve të tjerë në Europë.
Për muajin Mars, pasagjerët në Rinas u rritën me vetëm 9.2%, duke e renditur Shqipërinë në vendin e 26-të në klasifikimin e Këshillit Ndërkombëtar të Aeroporteve për Europën.
Momentin më të kënaqshëm po e kalojnë aeroportet në Turqi, të cilat po përfitojnë nga rikthimi i turizmit në vend, por edhe aeroporte si “Adem Jashari” i Prishtinës dhe “Aleksandri i Madh” në Shkup, ku ky i fundit regjistroi në Mars një rritje me 25%.
Vetëm brenda rajonit, Shqipëria ka një performancë më të dobët se Maqedonia, Kosova dhe Bosnje-Hercegovina. Ndërkohë, të dhënat për Malin e Zi mungojnë, por rezultati i dy muajve të parë fliste për një rritje mesatare me 19.5%, rritje e cila me shumë gjasa vijoi edhe gjatë muajit të kaluar.
I vetmi aeroport kryesor në rajon, të cilin “Nënë Tereza” ka mundur ta kalojë në performancë është ai “Nikola Tesla” në Beograd, i cili megjithatë ka regjistruar 1 milionë pasagjerë në tre muajt e parë të vitit.
Por aeroporti në Beograd po shkëlqen në një tregues tjetër të transportit ajror, atë të transportit të mallrave, ku nga viti në vit volumi është rritur me 29.6%. Rritje në këtë drejtim ka edhe Shkupi e Prishtina me 10.1%-10.3%, ndërsa për Tiranën, regjistrohet një rënie me 1%.
Megjithatë, Shqipëria do të ketë kohë për të rikuperuar në fushën e aviacionit gjatë sezonit veror, kur hyrjet e turistëve dhe daljet e shqiptarëve për pushime do të nxisin më tej rritjen. Kujtojmë që verën e kaluar, numri i pasagjerëve në Rinas u rrit deri në 31.2%, duke procesuar vetëm nga Qershori në Shtator mbi 1.1 milionë udhëtarë.
Angelo Haruni/SCAN
Kompanitë ajrore në Shqipëri – Blue Panorama rrëmben 28% të pasagjerëve. Ndjekin Ernest dhe Alitalia
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.