Transporti ajror, “shkatërrohet” rrjeti global që mashtronte me biletat online. Operacioni në 226 aeroporte – Ndalohen 195 persona
“Shkatërrohet” rrjeti global i mashtrimit me biletat në linjat e transportit ajror. Europol, pas një operacioni të madh ndërkombëtar, njofton se janë ndaluar 195 persona të dyshuar për mashtrim në blerjen e biletave të avionëve, duke përdorur karta false krediti.
Operacioni u përqendrua në 226 aeroporte, në 61 vende, në 63 kompani ajrore dhe në 6 agjenci udhëtimi online.
Nga ky operacion, i cili u zhvillua nga data 16 dhe 20 tetorit 2017 u raportuan 298 transaksione të dyshimta.
Si rezultat, 195 persona u arrestuan ose iu mohua e drejta e udhëtimit, pasi akuzoheshin penalisht.
“Hetimet janë në vazhdim. Disa persona u kapën në përpjekje për të trafikuar drogë nga Amerika Latine në Evropë. Më së shumti këta persona do të udhëtonin me bileta të blera me anë të mashtrimit. Operacioni u organizua nëpërmjet qendrave koordinuese të Europol në Hagë, INTERPOL Global Complex për Inovacionin në Singapor dhe Ameripol në Bogota, gjithashtu u mbështet nga autoritetet kanadeze, si dhe nga autoritete në Shtetet e Bashkuara të Amerikës”.
Drejtori Ekzekutiv i Europol, Rob Wainwright tha: “Mashtrimi i biletave ajrore lidhet më së shumti me çështjet e sigurisë, ndaj ne nuk mund të lejojmë askënd, veçanërisht kriminelët e terroristët të udhëtojnë si anonimë në mbarë botën. Policia dhe sektori privat ndanë informacione rreth aktiviteteve të dyshimta online, duke shkatërruar aktivitete kriminale”, u shpreh kreu i Europol.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.