Transporti ajror – Tregu i pasagjerëve u rrit me 10.4% për tremujorin
Tregu i transportit ajror të pasagjerëve po rritet me ritme dyshifrore edhe gjatë këtij viti. Sipas të dhënave nga Instituti i Statistikave, për tre muajt e parë të vitit afro 561 mijë pasagjerë kanë përdorur transportin ndërkombëtar ajror për të hyrë ose dalë nga Shqipëria.
Numri i pasagjerëve është në rritje me 10.4% ndaj të njëjtës periudhë të një viti më parë. Tregu i transportit ajror është drejt rritjes për të shtatin vit radhazi, ndërkohë që për vitin e kaluar numri i udhëtarëve që përdorën Aeroportin Ndërkombëtar të Tiranës për vitin 2017 ishte 2.6 milionë, në rritje me afro 20% krahasuar me vitin 2016.
Aeroporti i Tiranës është ndër përfituesit kryesor të rritjes së numrit të pasagjerëve, ndikuar në një masë të madhe edhe nga rritja e numrit të turistëve dhe vizitorëve të huaj në Shqipëri.
Për tremujorin, numri i vizitorëve të huaj në Shqipëri u rrit me 12.5% krahasuar me vitin e kaluar. Rritja e vazhdueshme e tregut të pasagjerëve nënkupton një potencial të rëndësishëm, që mund të shfrytëzohej edhe më tepër, nëse Shqipëria do të mund të ofronte kushte për fluturime të kompanive low cost.
Qeveria ka nisur negociatat me një kompani turke për ndërtimin e një Aeroporti në Vlorë, ndërkohë që ka dështuar, deri tani, të bëjë operativ Aeroportin e Kukësit. Aktualisht, në Aeroportin e Tiranës operojnë 19 kompani ajrore, që për tre muajt e parë të këtij viti kryen mbi pesë mijë fluturime.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.