Transporti interurban, shoqata letër Ramës – SCAN siguron shkresën: Anuloni shtimin e linjave

Shoqata e Transportit Kombëtar Interurban ka kërkuar pezullimin e udhëzimit të ministrisë së Transporteve dhe Infrastrukturës për shtimin e linjave urbane si dhe pezullimin e procedurës, të shpallur nga ky institucion për përzgjedhjen e subjekteve për të operuar në linjat e rregullta ndërqytetase.

Përmes një shkrese, të siguruar nga TV SCAN, që mban datën 31 korrik 2017, drejtuar kryeministrit Edi Rama shoqata argumenton arsyet e kërkesës së saj, duke theksuar se shtimi i 80 linjave të reja nuk është bazuar në asnjë studim që argumenton se përse janë të nevojshme dhe të domosdoshme.

Sipas shoqatës, 4 vite më parë qeveria ndërmori një reformë në këtë sektor, ndërsa u hartuan edhe studime të detajuara nga ekspertë kombëtarë dhe ndërkombëtarë, të cilët përcaktuan se  260 linja janë të mjaftueshme për një shërbim cilësor në këtë sektor.

Por, në shkresë theksohet se ky studim është anuluar më vonë nga drejtuesit e MTI, me pasojë miratimin e 360 linjave të transportit të udhëtarëve.

Gjithashtu, shoqata thekson se për motive të errëta dhe në kundërshtim me ligjin, gjatë kësaj periudhe janë licencuar shoqëri transporti  me probleme dhe joserioze në raport me kriteret ligjore.

“Miratimi i këtij udhëzimi është jo vetëm në shkelje të ligjit, por dhe moralisht nuk duhet të ishte miratuar dhe tenderuar nga një person, i cili ditët në këtë post i ka të limituara nga vullneti i sovranit”,-vijon shkresa e Shoqatës së Transportit Kombëtar Interurban, ndërsa theksohet se nëse do të vijohet  procedura e tenderimit dhe dhënies së licencave 5-vjeçare atëherë anulimi i tyre do të pasohej edhe nga një kosto e konsiderueshme financiare në dëm të shtetit.

Sipas shoqatës, mungesa e argumentuar e bashkive përkatëse për shtimin e linjave, është fakt i mjaftueshëm për të pezulluar të gjitha procedurat e ndërmarra me nxitim para ndryshimit të titullarit aktual të Ministrit të Transportit.

Një javë më parë shoqata organizoi një protestë një ditore, që solli paralizimin e transporti interurban, ndërkohë që ministria e konsideroi atë si të jashtëligjshme.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.