Transporti në protestë – Përplasje me policinë, shoferët: Duam pagë nga shteti që të mbajmë familjet

Pavarësisht se autoritetet shtetërore njoftuan nisjen e transportit publik, një pjesë e operatorëve kanë refuzuar të ofrojnë shërbim, teksa protestuan për të disatën herë për plotësimin e kërkesave të tyre. Punonjësit e linjave urbane dhe interurbane u ankuan se që prej bllokimit për shkak të situatës së krijuar nga COVID-19 kanë marrë vetëm pagesën prej 40 mijë lekësh, teksa kërkuan të paguhen sërish, pasi kjo shumë është tërësisht e pamjaftueshme për një periudhë 4-mujore.

Ndërkaq, gjatë protestës së të mërkurës nuk munguan as përplasjet me policinë, që tentoi të shpërndante protestuesit, teksa një pjesë e punonjësve u shoqëruan në komisariat.

Transporti ishte një prej aktiviteteve të parë që u mbyll pas regjistrimit të rasteve të para me COVID-19 në vend. Ndërkohë që, operatorët kanë kërkuar ndërhyrjen e qeverisë për rimëkëmbjen e sektorit që po kalon një situatë të vështirë financiare.  Ata kërkojnë heqjen e akcizës së naftës, uljen e TVSH-së në shitje në masën 6%  si dhe faljen e taksave dhe tarifave vendore. Aktualisht, autoritetet kanë vendosur se do të njihen si shpenzime të zbritshme në masën 100% konsumi i naftës, ndërsa paralelisht është kërkuar edhe mbështetja e pushtetit vendor, përmes përjashtimit nga taksat lokale deri në 31 dhjetor të 2020-ës.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.