Transporti publik – Veliaj: Vitin tjetër vjen flota e parë e autobusëve elektrikë
Vitin e ardhshëm në kryeqytet do të vijë flota e parë e autobusëve elektrikë e cila do të ofrojë transport publik pa ndotje. Lajmin e ka bërë të ditur kryetari i Bashkisë së Tiranës, Erion Veliaj, gjatë prezantimit të ‘Guidës Studentore’ për studentët e rinj.
“Vitin tjetër do fillojmë me autobusët elektrikë. Është një mënyrë shumë më komode për të përdorur transportin publik, sidomos tani që po bëjmë linjat e dedikuara jo vetëm për biçikletat, por duke filluar në unazë edhe për autobusët. Nëse doni të lëvizni në Tiranë është më mirë të përdorni një biçikletë”, tha Veliaj.
Ndërsa ka cilësuar edhe një herë si lajm të mirë vendimin e qeverisë për mbylljen e pikave të basteve nga qytetit, e si rrjedhojë edhe nga Qyteti Studenti, Veliaj tha se këto para mund të shpenzoheshin për sport, aktivitete dhe ekskursione.
“Kështu çunat do të kenë më shumë kohë për sport përdoren për dhe më shumë para në xhep. Mezi pres të vijë 1 janari, që të lirohen edhe hapësirat e zëna me pika e biznese të tilla në Qytetin Studenti. Ato janë para që mund të shpenzoheshin shumë më mirë me sport, aktivitete, ekskursione”, u shpreh Veliaj.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.