Trazirat e SHBA në tregje – Investitorët dyshojnë për kalimin e politikave pro-rritjes së Trump
Trazirat politike në Shtetet e Bashkuara kanë sjellë një ndikim të fortë në tregjet financiarë. Presidenti Donald Trump, dyshohet se i ka kërkuar ish-drejtorit të Byrosë Federale të Hetimit James Comey, që të pezullojë hetimet për lidhjet e ish-këshilltarit mbi Sigurinë Kombëtare Michael Flynn me Rusinë.
Investitorët janë të shqetësuar nëse Donald Trump do të ketë mundësinë të kalojë politikat e tij pro rritjes ekonomike.
Të 3 indekset kryesore të titujve të kapitalit në Shtetet e Bashkuara, u mbyllën dje në darkë në një rënie me më shumë se 1%, duke treguar performancën më të dobët që prej Shtatorit të kaluar.
Dollari amerikan ra nga 112.5 në 110.4 kundër jenit japonez. Indeksi i titujve të kapitalit në Japoni ra me 1.32%, duke mos reaguar ndaj publikimit të Produktit të Brendshëm Bruto për vendin, që u rrit sipër projeksioneve. Bursat Europiane ndoqën në performancë negative në sesionin e ditës së Enjte, me kompanitë e sektorit financiar që patën rënien më të madhe.
Matësit e luhatshmërive në tregje, u rritën në nivelin më të lartë që prej daljes së Britanisë nga Bashkimi Europian. Ari, që konsiderohet si aktive e mbrojtur nga rreziku, u rrit nga 1240 dollarë për onz në 1262, që ishte niveli më i lartë ditor.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.