Tre bomba të Luftës II Botërore evakuojnë Hanoverin – 50 mijë banorë largohen nga shtëpitë
Në Hanover janë evakuar 50 mijë banorë nga shtëpitë e tyre, ndërsa ekspertët përpiqen të çaktivizojnë tre bomba të pashpërthyera britanike nga Lufta e Dytë Botërore.
Operacioni është i dyti më i madh i kësaj natyre në Gjermani dhe ka prekur një të dhjetën e popullsisë së qytetit. Mes ndërtesave të evakuara janë shtatë azile, një klinikë dhe një fabrikë gomash.
Zyrtarët besojnë se të prekurit do të mund të rikthehen në shtëpitë e tyre në mbrëmje.
Afati për t’u larguar ishte ora 09:00 dhe banorëve iu tha të marrin me vete mjetet e nevojshme, ilaçet dhe të fikin elektroshtëpiaket dhe gazin.
Sipas njoftimeve, dy nga bombat u çaktivizuan, ndërsa e treta e cila ishte e dëmtuar mund të ketë nevojë për një makinere të veçantë prerjeje. Dy bomba të tjera të dyshuara, ndërkohë, dolën se ishin thjesht metale për skrap.
Strehimet e emergjencës janë caktuar pranë tre shkollave dhe dhjetëra mijëra racione supë janë përgatitur për banorët. Qyteti ka përgatirur edhe një program me ture në muze, filma për fëmijë dhe evente sportive për të ndihmuar ta kalojnë ditën sa më mirë të ishte e mundur.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.