Tregjet e kapitalit në vrull – E nisin muajin në rritje rekord, vlerat e larta shqetësojnë ekonomistët

Tregjet e kapitalit e kanë nisur ditën e parë të Nëntorit në performancë fantastike, duke treguar gjithashtu rritje për muajin që kaloi.  Në SHBA, të tre indekset kryesorë të titujve të kapitalit janë fuqizuar gjatë muajit, me S&P 500 dhe Dow Jones që e mbyllën Tetorin me 2.2% dhe 4.3% rritje në mënyrë respektive.

Të dy këto indekse kanë shënuar muajin e 7-të radhazi të rritjes, ndërsa Nadaq, me 3.6%, ndodhet në muajin e 4-t.   Ndër sektorët që kanë patur rritje më të madhe në tregjet e Shteteve të Bashkuara ka qenë teknologjia,  me 7.7%, që është rritja më e madhe mujore që prej Korrikut 2016.

Tregjet aziatike e nisën ditën e parë të muajit në performancën më të mirë në 10 vite. Kjo vjen edhe prej raportimit të kompanive për tremujorin e tretë, ku shumica kanë treguar rezultate sipër projeksioneve.

Humori është përhapur edhe në Europë,  ku tregjet e aksioneve prekën nivelet më të larta në 2 vite gjatë sesionit të parë tregtar të këtij muaji. Tregjet e kapitalit kanë treguar rritje të vazhdueshme dhe vlera e aksioneve ka arritur në një nivel që po shqetëson analistët.

Sipas modelit të vlerësimit të ekonomistit fitues të çmimit Nobel,  Robert Schiller,  vlerat e titujve të kapitalit ndodhet në nivele, që kalohen vetëm nga periudha përpara depresionit të madh apo përpara flluskës dot-com në vitet 2000.  Ekonomsti krahason çmimet e aksioneve me të ardhurat prej tyre në një periudhë 10-vjeçare (CAPE ratio).

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.