Tregjet europiane, në pritje të BQE – Wall Street publikon fitime për të dytën ditë me radhë
Tregjet europiane janë hapur me ndryshime të vogla në sesionin e sotëm, ndërsa investitorët po presin takimin e Bankës Qendrore Europiane të enjten dhe të dhënat mbi inflacionin në SHBA të premten.
Indeksi pan-Europian STOXX 600 po qëndron në rënie të lehtë me 0.2%, ndërsa sektori i shitjeve me pakicë realizon fitimet më të mëdha, në rritje me 1.8%. Analistët parashikojnë se inflacioni në SHBA do të jetë ngadalësuar lehtë gjatë majit dhe mund të ketë arritur kulmin. Gjithsesi, analistët nuk e përjashtojnë mundësinë e një tjetër rritje të normës bazë të interesit nga Rezerva Federale, javën e ardhshme.
Ndërkohë, tregjet në rajonin e Azi-Paqësorit janë mbyllur në rritje dhe një pjesë e mirë e tregjeve ishin në pritje të vendimit të Bankës Qendrore të Indisë mbi normat e interesit. Edhe në Wall Street, indekset kryesore publikuan fitime për të dytin sesion me radhë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.