Tregtia e jashtme sipas shteteve – Edhe me rajonin, inflacioni “maskon” performancën. Në skenë dalin shtete të “treta”
Sa i përket shteteve, shifrat e tregtisë së jashtme në import tregojnë një rritje të ndjeshme të volumeve tregtare me vende të “treta”, si Azerbaixhani, Korea e Veriut, Kazakistani, Arabia Saudite, etj. Ndër vendet partnere ndërkohë, në vend të parë në terma rritje, me thuajse 300% gjejmë Zvicrën. Vendet e Ballkanit Perëndimor ndërkohë regjistrohen që të 5-ta në një rritje, nga 96.7%, deri në 267.7%, sinjalizojnë shifrat zyrtare, të përpunuara dhe analizuara nga “Scan Intelligence Unit”.
Por edhe këtu, duhet t`i analizojmë të dhënat, të “zhveshura” nga efekti i inflacionit, ku vëmë re se vetëm me Malin e Zi dhe me Kosovën importet janë rritur në peshë, ndërkohë që për Serbinë, Maqedoninë e Veriut dhe Bosnje Hercegovinën, shifrat janë në rënie të ndjeshme, paçka se në vlerë vihet re një rritje. Sa i përket eksporteve ndërkohë, vihet re një rritje në peshë vetëm për Bosnje Hercegovinën dhe Serbinë, ndërkohë që Kosova, Maqedonia e Veriut dhe Mali i Zi regjistrohen në rënie në terma vjetorë, paçka se në vlerë, të pesta janë në rritje të ndjeshme.
Gjatë njëmbëdhjetëmujorit të këtij viti, vendet me të cilët Shqipëria ka pasur rritjen më të madhe të eksporteve, në krahasim me një vit më parë, janë: Italia (24,3 %), Kosova (48,5 %) dhe Spanja (44,0 %), ndërsa vendet me të cilat eksportet kanë pasur uljen më të madhe, janë: Ukraina (18,9 %) dhe Rusia (9,6 %). Ndërkohë, sa i përket importeve, për 11-mujorin, vendet me të cilët Shqipëria ka pasur rritjen më të madhe të importeve, në krahasim me një vit më parë, janë: Italia (28,4 %), Turqia (48,1 %) dhe Kina (20,7 %). Ndërsa vendi me të cilin importet kanë pasur uljen më të madhe është: Ukraina (10,1 %).
Roekl Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.