Tregtia e mallrave – Volumi në transportin detar u rrit me 26% për korrikun
Volumi i mallrave të transportuara në portet shqiptare u rrit me më shumë se 25% gjatë muajit korrik. Statistikat e Instat dëshmojnë për një rritje të sasisë së mallrave të transportuara në rrugë detare, sinjal ky i zgjerimit të volumeve të tregtisë së jashtme.
Sasia e mallrave të ngarkuara dhe shkarkuara në rrugë detare për 7-mujorin e parë të vitit arriti në 2.6 milionë tonë, afro 16% më shumë krahasuar me të njëjtën periudhë të një viti më parë.
Në vlerë, rritja e volumit të tregtisë për këtë vit është më modeste, çka mund të lidhet me ndryshime në strukturën e tregtisë së jashtme, uljen e çmimeve, por edhe me mbi çmimit të lekut në kursin e këmbimit valutor.
Sipas Instat, vlera totale e këmbimeve tregtare të Shqipërisë për shtatë muajt e parë të vitit ishte rreth 557 miliardë lekë, me një rritje prej më pak se 1% krahasuar me një vit më parë. Rënia ka ardhur kryesisht te eksportet, ndërsa importet rezultojnë në rritje me 2.6%.
Por, diferenca ka ardhur kryesisht nga përmbysja e bilancit të energjisë elektrike. Në shtate mujorin e vitit të kaluar, bilanci i këmbimeve të energjisë ishte pozitiv për rreth pesë miliardë lekë, ndërsa këtë vit ai ishte negativ, për mbi 14 miliardë lekë.
Ndërkohë, në lëvizjet e shtetasve vazhdon të rritet kryesisht tregu i transportit ajror. Sipas të dhënave nga Instituti i Statistikave, në shtatë muaj numri i udhëtarëve nga Aeroporti Ndërkombëtar i Tiranës ishte rreth se 1.8 milionë.
Krahasuar me 7-mujorin e vitit të kaluar, numri i pasagjerëve është rritur me 11.2%. Vetëm për korrikun, nga aeroporti i vetëm funksional i vendit kaluan 385 mijë udhëtarë. Në aeroportin e Tiranës veprojnë aktualisht 21 kompani ajrore, që për shtatë muaj kryen pothuajse 16 mijë fluturime.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.