Tregtia neto në Japoni – Eksportet ngadalësohen lehtë, tendenca vazhdon në rritje
Eksportet e ekonomisë së tretë më të madhe në botë janë ngadalësuar në Shtator, për të parën herë në 3 muaj, duke treguar se kërkesa jashtë vendit për mallrat e Japonisë mund të ketë rënë.
Rritja me 14.1% e eksporteve me bazë vjetore ishte poshtë vlerësimeve të analistëve dhe poshtë rritjes së muajit Gusht me 18.1%. Ekonomistët presin që eksportet e Japonisë të rinisin rritjen me një normë më të shpejtë, ndërkohë që kërkesa rimëkëmbet drejt sezonit të blerjeve në fund vit dhe ndërsa jeni i dobët po shton konkurrueshmërinë e firmave eksportuese.
Në të dhënat e Shtatorit ndikuan dërgesat më të ulëta të makinave dhe pajisjeve elektronike, sipas Ministrisë së Financave. Megjithatë, të dhëna të tjera për ekonomitë aziatike treguan se kërkesa për pajisje elektronike qëndron e fortë.
Koreja e Jugut dhe Tajvani patën një rritje sipër projeksioneve të dërgesave të pajisjeve për Shtatorin. Në volum, eksportet e Japonisë patën rritje me 4.8% në Shtator me bazë vjetore. Eksportet drejt Shteteve të Bashkuara u rritën me 11.1% prej pajisjeve elektronike dhe produkteve farmaceutike.
Suficiti me ekonominë më të madhe të botës u rrit me 5.1% në Shtator, në 5,46 miliardë dollarë. Shtetet e Bashkuara i kanë bërë thirrje Japonisë që të bashkohet në negociata bilaterale të tregtisë për të ulur deficitin tregtar. Edhe me Kinën, tregtia qëndroi e fortë, me një rritje prej 29.3% të eksporteve gjatë Shtatorit. Importet në total të Japonisë u rritën me 12%, duke e çuar tregtinë neto në rreth 5.9 miliardë dollarë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.