Tregtimi i pjesëve të këmbimit – Liberalizohet tregu, jo më licencë për ushtrimin e aktivitetit

Subjektet që tregtojnë pjesë këmbimi të mjeteve rrugore apo rimorkiove nuk do të duhet më të pajisjen me licencë për ushtrimin e këtij aktiviteti.

Gjithçka parashikohet në një projektligj, të mbërritur në Kuvend për diskutim, i cili shfuqizon edhe licencat për tregtimin e pjesëve të këmbimit të autorizuara nga prodhuesi si dhe agjencive që trajtojnë praktikat e qarkullimit të mjeteve me motor, duke bërë që këto aktivitete të jenë të lira.

Këto ndryshime vijnë në kuadër të reformës së derregullimit, që ka si qëllim krijimin e lehtësirave për përmirësimin e klimës së biznesit, nëpërmjet reduktimit të barrierave administrative.

Deri më tani, përpara se të nisnin veprimtarinë, këto subjekte ishin të detyruara të regjistroheshin pranë drejtorive rajonale të shërbimeve të transportit rrugor, në territorin ku kishin selinë.

Ndërkohë që, me ndryshimet e propozuara, mjafton që këto subjekte të kenë të regjistruar në regjistrin tregtar, si objekt të veprimtarisë së tyre, trajtimin e praktikave të qarkullimit të mjeteve me motor.

Në kuadër të reformës së derregullimit janë analizuar të gjitha licencat dhe lejet që jepen nga Qendra Kombëtare e Licencimit, ndërsa është arritur në konkluzionin se 23 licenca duhet të eliminohen.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.