Tregu ajror gjatë pandemisë – AAC: Aviacioni, ndër industritë më të prekura, ja kompanitë që dominuan fluturimet

Autoriteti Aviancionit Civil konfirmon se gjatë vitit 2020, industria e aviacionit ishte ndër sektorët më të goditur dhe ai që po e ndjen më shumë impaktin e pandemisë së shkaktuar nga COVID-19. Ndalimet e fluturimeve, pezullimet e përkohshme dhe masat e shtuara gjatë vitit që lamë pas ulën ndjeshëm numrin e fluturimeve dhe udhëtarëve të ajrit. Ndërkohë që, referuar të dhënave zyrtare të ardhura nga Aeroporti Ndërkombëtar “NënëTereza”, në total ishin rreth 1.3 mln pasagjerë të cilët kanë udhëtuar përmes këtij aeroporti.

Bazuar në të dhënat zyrtare, kompania“Wizz Air” ka zotëruar tregun me 24% të totalit të pasagjerëve gjatë vitit 2020, duke vijuar me nga 14%, zotërim i tregut nga kompania shqiptare “Air Albania” dhe “Blue Panorama”. Në vendin e katërt renditet kompania shqiptare Albawings, e cila ka zotëruar 10% të tregut përgjatë 2020-ës. Kompania e cila ka përqindjen më të lartë të rritjes për vitin 2020 është kompania Air Albania, me 31% më shumë se në 2019.

Kjo rritje mund të shpjegohet me faktin se kompania e vetme me kapital shtetëror kreu më së shumti fluturimet e riatdhesimeve të qytetarëve që mbetën jashtë kufijve shqiptarë për shkak të kufizimeve. Rritje ka pasur edhe kompania Easy Jet e cila këtë vit ka shtuar destinacionet si dhe numrin e fluturimeve për dhe nga TIA. Ndërkaq, për shkak të pandemisë dhe kufizimeve të pasagjerëve për të udhëtuar pjesa më e madhe e kompanive që operojnë për /nga TIA, kanë ulje të lartë në krahasim me vitin 2019.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.