Tregu energjetik Shqipëri-Kosovë, Gjiknuri takim me Llukën. Kosova e gatshme të marrë pjesë në Bursën Shqiptare
Edhe Kosova do të marrë pjesë në bursën shqiptare. Kjo u konfirmuar pas takimit të ministrit të Infrastrukturës dhe Energjisë Damian Gjiknuri me Ministrin e Zhvillimit Ekonomik të Kosovës Valdrin Lluka. Mes palëve u diskutua edhe krijimi i tregut të përbashkët energjetik, për riaktivizimin e grupeve të punës drejt unifikimit të tregjeve.
“Një bashkëbisedim i frytshëm mes dy delegacioneve dhe që i paraprin mbledhjes së përbashkët të qeverive. Kemi një punë të mirë të nisur tashmë me Kosovën për krijimin e tregut të përbashkët energjetik. Vendosëm të riaktivizojmë grupet e punës për ecjen përpara drejt unifikimit të tregjeve. U diskutua vazhdimi i procesit të krijimit të Bursës energjetike në Shqipëri dhe gatishmëria e Kosovës për të marrë pjesë në të”, nënvizoi ministri Gjiknuri.
Ministri Lluka vuri theksin tek perspektiva e bursës shqiptare të energjisë dhe përfshirja e Kosovës në të.
“Diskutuam tregun e përbashkët, bursën shqiptare të energjisë, pjesë e të cilës ne shpresojmë të jemi. U angazhuam që grupet të jenë më aktive për intensifikimin e punës mes dy shteteve. Transmisioni i Kosovës do të jetë pjesë e bursës shqiptare në formë aksionari dhe grupi i punës do ti definojë më tej detajet. U dakordësuam të kemi edhe një grup koordinues në nivel politik që të ndihmojë për ecjen më shpejt të axhendës së përbashkët”, u shpreh Lluka.
Dy ministrat u angazhuan për rakordimin e mëtejshëm të veprimeve për vendosjen në funksionim të linjës së interkonjeksionit 400 kilovolt mes dy vendeve.
“Diskutuam edhe për një çështje shumë të rëndësishme që është kthyer në një problem, jo mes vendeve tona por me vende të tjera të rajonit. Po flas për vënien në funksionim të linjës së interkonjeksionit Shqipëri-Kosovë, një investim i rëndësishëm nga vende të Bashkimit Evropian, projekt në kuadër të interkonektivitetit dhe në thelb të integrimit të vendeve tona. Shqipëria do të luajë rolin e mbështetësit për këtë projekt, do të lobojmë fort të dy vendet që në çdo forum ku të jemi tua vëmë në dukje partnerëve evropianë se vënia në punë e kësaj linje është alfa dhe omega e çdo gjëje për integrimin energjetik të dy vendeve. Do të bëjmë gjithçka që kjo çështje të ngrihet në nivelet më të larta”, u shpreh ministri Gjiknuri.
Sipas ministrit Llukaj, linja e transmetimit mbetet jo aktive për shkaqe politike.
“Vjen për shkak të problemeve që ne kemi me Serbinë. Shqipëria do vazhdojë të na përkrahë në këtë drejtim. Kjo është mjaft e rëndësishme pasi si Kosovë kemi nevojë më shumë se kurrë që të jemi pjesë e rrjetit të transmetimit të Evropës”, sqaroi Llukaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.