Tregu i fluturimeve – 1.1 milionë udhëtarë për pesë muaj

Tregu i transportit ajror të pasagjerëve po rritet me ritme të larta edhe këtë vit. Sipas të dhënave nga Instituti i Statistikave, për muajin maj 250 mijë pasagjerë udhëtuan nga Aeroporti i Tiranës, në rritje vjetore me 14%. Për herë të parë, qysh në fund të pesëmujorit u tejkalua kufiri i 1 milionë pasagjerëve. Më saktësisht, në pesë muaj kjo shifër arriti në 1.1 milionë, në rritje me 11% krahasuar me të njëjtën periudhë të një viti më parë.

Tregu i transportit ajror po rritet për të tetin vit radhazi. Vitin e kaluar numri i udhëtarëve që përdorën Aeroportin Ndërkombëtar të Tiranës arriti në afërsisht tre milionë, në rritje me 12% krahasuar me vitin 2017. Ky treg po rritet, i shtyrë nga rritja e vazhdueshme e turizmit hyrës dhe dalës nga Shqipëria. Për pesë muajt e parë të këtij viti, u regjistruan 1.5 milionë hyrje të shtetasve të huaj dhe 2.2 milionë dalje të shtetasve shqiptarë jashtë vendit.

Tregu i fluturimeve ndërkombëtare ngelet ende monopol i Aeroportit të Tiranës dhe kompania koncesionare që e menaxhon është ndër përfituesit kryesorë të rritjes së numrit të pasagjerëve. Vitin e kaluar, shoqëria TIA arriti një fitim rekord prej afro 20 milionë eurosh. Në këtë aeroport operojnë aktualisht 20 shoqëri, që për pesë muajt e parë të vitit kryen mbi 10 mijë fluturime.

Me gjithë premtimet e bujshme, ende nuk ka rezultate konkrete për mundësimin e fluturimeve ndërkombëtare nga aeroporte të tjerë. Qeveria lidhi në fillim të këtij viti kontratën me një bashkim investitorësh shqiptarë, për të bërë operativ aeroportin e Kukësit. Por, kryerja e investimeve të nevojshme dhe nisja e fluturimeve do të kërkojnë të paktën dy vjet kohë.

Qeveria synon gjithashtu të ndërtojë një aeroport pranë Vlorës, por negociatat me një konsorcium turk, që kishte paraqitur propozim të pa kërkuar, dështuan. Ministria e Infrastrukturës ka bërë të ditur se për ndërtimin e këtij aeroporti do të hapet një garë ndërkombëtare, me qëllim gjetjen e investitorëve të rinj. Megjithatë, për këtë proces ende nuk ka zyrtarisht afate, ndaj ndërtimi i një aeroporti në Vlorë, për momentin, është pak më shumë se një dëshirë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.