Tregu i liberalizuar i energjisë, ende larg – Pengesat, nga matësit smart, te rritja e tarifave dhe ngritja e bursës së energjisë
17 shtatori i këtij vit duhet të shënonte përmbylljen e daljes në treg të lirë energjie për konsumatorët e lidhur në tensionit 20 KV, por të dhënat tregojnë se procesi nuk ka nisur ende, ndërkohë që institucionet përgjegjëse e kanë të vështirë të japin një afat, sidoqoftë ekstraligjor se kur kjo do të ndodhë. Liberalizimi nënkupton që të gjithë këta abonentë do të kenë mundësi të zgjedhin vetë furnizuesin e tyre të energjisë, si dhe të nënshkruajnë kontrata individuale mes tyre, ku ndër të tjera përcaktohet edhe çmimi me të cilin do të blejnë energjinë. Hapja e tregut synon të sigurojë çmime konkurruese për të gjithë këta klientë, të cilët aktualisht furnizohen nga Operatori i Shpërndarjes së Energjisë Elektike, me tarifa që përcaktohen nga Enti Rregullator i Energjisë. Klientët e lidhur në tensionin 20 KV përbëjnë një pjesë të rëndësishme të abonentëve, por OSHEE nuk pranoi të japë detaje mbi arsyet e vonesave.
Megjithatë, sipas këtij dikasteri një pjesë e tyre lidhet me instalimin e matësve inteligjentë (Smart Meter), një investim që po kryhet nga Operatori i Sistemit të Transmetimit. Pyetur nga TV SCAN, administratori i OST, Skerdi Drenova tah se investimi po shkon drejt përfundimit, pasi rreth 95% e sistemit të matjes për tensionin 20 kV ka përfunduar. Më konkretisht, sipas të dhënave të OST, të vëna në dispozicion për Scan, nga 328 klientë, është instaluar sistemi i matjes për 295 prej tyre, ndërsa 6 të tjerë janë në proces intaslimi. Gjitahshtu, 3 prej tyre nuk ekzistojnë, ndërsa 2 të tjerë kanë sistemet e tyre të matjes. Ndërkaq, 16 abonentët e tjerë kanë refuzuar instalimin e sistemit të ri.
“Ne po e ndjekim procesin dhe do të ndërhyjmë së bashku me OSHEE-në dhe Policinë e Shtetit”, tha Drenova. Megjithatë, kreu i Entit Rregullator të Energjisë, Petrit Ahmeti thotë se ngritja infrastrukturës për matësit inteligjentë nuk pengon liberalizimin e tregut për këta klientë. Kreu i ERE-s përmendi një tjetër faktor, që lidhet me përcaktimin e tarifës së shpërndarjes së energjisë. Kjo pasi Operatori i Sistemit të Shpërndarjes (OSSH), që është një nga kompanitë e krijuara nga ndarja e OSHEE-së, ka aplikuar për rritjen e kësaj tarife, çka impakton direkt klientët e liberalizuar. Ndërkaq, edhe një tjetër hallkë e rëndësishme në drejtim të liberalizimit të tregut të energjisë, që është ngritja e Operatorit të Tregut (bursës së energjisë), nuk do të jetë gati as këtë vit, pavarësisht vonesave disa vjeçare. Deri më tani janë përzgjedhur aksionerët e saj, që janë OST dhe KOSTT (Operatori i Sistemit të Transmetimin të Kosovës) sh.a., por sipas Drenonvës, operimi i bursës pritet të nisë në fund të tremujorit e parë të vitit 2021.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.