Tregu i shqiptar i fluturimeve arrin në 3.3 milionë pasagjerë! AAC: Rritje e fortë e “Wizz Air” dhe “Lufthansa”

Referuar të dhënave zyrtare të ardhura në Autoritetin e Aviacionit Civil nga Aeroporti Ndërkombëtar “Nënë Tereza”, shifrat tregojnë se ka pasur një numër prej 3 milionë e 338 mijë e 149 pasagjerë të cilët kanë udhëtuar gjatë vitit 2019 për/nga TIA.  Nëse do të bënim krahasimin e tre viteve të fundit, trafiku ajror dhe fluksi i pasagjerëve këtë vit, ka një rritje prej 13% krahasuar me vitin e kaluar.

Bazuar në të dhënat e mësipërme, kompania Italiane “Blue Panorama” ka zotëruar tregun me 18% të totalit dhe një numër prej 598,495 pasagjerë gjatë vitit 2019, duke vijuar me 16% që është zotëruar nga kompania “Ernest Airlines” me 535,037 pasagjerë. Pasuar kjo nga kompania shqiptare Albaëings, e cila ka zotëruar 10% të tregut përgjatë 2019 me 324,489 pasagjerë.

Grafiku tregon se kompanitë që fluturojnë drejt Italisë, si “Air Albania”, “AlbaWings”, “Blue Panorama”, “Ernest S.p.A”, “Alitalia”, zotërojnë përqindjen më të madhe në tregun e transportit ajror gjatë vitit 2019, duke zënë përafërsisht 54% të totalit.

Përsa i përket rritjes/rënies së fluksit të lëvizjes së pasagjerëve përgjatë viteve 2017, 2018, 2019, kompania e cila ka përqindjen më të lartë të rritjes për vitin 2019 krahasimisht me 2018 është kompania “Wizz Air”, 124% më i lartë së në vitin 2018 ka qenë numri i pasagjerëve për këtë kompani.

Kompania “Wizz Air” hyri në tregun shqiptar në vitin 2017 me vetëm një destinacion, Budapestin, duke shtuar destinacionet për çdo sezon. Në mbyllje të vitit 2019, kompania fluturonte në 5 destinacione dhe deklaroi se në sezonin veror të 2020 do të fluturojë edhe në 5 destinacione të reja drejt Italisë.

Më pas vjen kompania “Lufthansa” e cila ka rritje 67% krahasimisht me vitin 2018, kjo rritje vihet re pasi kompania vitin e kaluar ka pasur një rritje shumë të vogël krahasimisht me vitin 2017.

Disa nga kompanitë sikurse duket në grafikun e mësipërm kanë ngritje më të vogla, dhe disa prej kompanive kanë ulje të numrit të pasagjerëve krahasimisht me vitin e kaluar, si “Blue Panorama” e cila ka pësuar rënie në numrin e pasagjerëve nga viti në vit.

Bie në sy se përveçse kompanisë “Wizz Air”, shifrat e të cilës nga viti në vit kanë ardhur duke u rritur edhe kompania “Ernest S.p.A” gjithashtu ka pasur rritje të dukshme nga viti në vit, por pavarësisht kësaj në Janar të 2020-ës ndërpreu fluturimet.

Në 2019 numri i destinacioneve që kanë fluturuar për/nga TIA në total ka qenë 59.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.