Tregu i sigurimeve/ Rënie më e kufizuar për muajin prill
Tregu i sigurimeve e kufizoi rënien gjatë muajit të dytë të pandemisë, falë një ecurie të mirë të primeve në sigurimin e katastrofave. Mbështetur në të dhënat nga Autoriteti i Mbikëqyrjes Financiare, për prillin primet e shkruara bruto ranë me 15% me bazë vjetore, ndërsa për marsin rënia kishte qenë shumë më e thellë, me 42%.
Prilli u “shpëtua”, pjesërisht, nga një rritje e fortë e sigurimeve në klasën e fatkeqësive natyrore. Primet e sigurimit nga zjarri dhe forcat e natyrës u trefishuan krahasuar me të njëjtën periudhë të një viti më parë dhe arritën vlerën e 279 milionë lekëve. Sigurimet në këtë klasë sollën 26% të primeve të shkruara bruto për prillin, ndërkohë që prillin e vitit të kaluar përbënin vetëm 7%. Zakonisht, luhatjet e sigurimeve në këtë klasë lidhen me kontrata të veçanta sigurimi në vlerë të madhe të kompanive private.
Në tërësi, shifrat progresive të katërmujorit dëshmojnë se pasojat e krizës në tregun e sigurimeve janë të qarta, me një rënie të primeve prej afërsisht 11% krahasuar me katërmujorin e vitit të kaluar.
Pa kontratat e sigurimit të fatkeqësive natyrore, rënia do të kishte qenë më e thellë. Shumica dërrmuese e klasave të sigurimit paraqiten në rënie të ndjeshme, duke filluar nga segmenti më i rëndësishëm i tregut, ai përgjegjësive për dëmet motorrike ndaj palëve të treta. Për katërmujorin klasat e përfshira në këtë grup kanë rënë me 16%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.