Tregu monetar vijon qëndrueshmërinë – Investitorët drejtohen te asetet me risk dhe lëndët e para!

Tregu monetar po shfaqet i qëndrueshëm edhe në sesionin e sotëm, ndërsa jeni japonez ka vijuar tendencën në rënie përballë dollarit amerikan. Tregjet janë rikthyer te asetet me risk dhe të lëndët e para. Në anën tjetër, dollari australian preku nivelin më të lartë që nga dhjetori i vitit 2015 në raport me jenin, ndërsa për këtë periudhë të marsit ka fituar rreth 8% të vlerës.

Investitorët e kanë lënë përkohësisht mënjanë shqetësimin që ka të bëjë me luftën në Ukrainë, edhe për faktin se palët kanë shprehur interes për të arritur një marrëveshje. Ndërkohë, yieldi i bonove 10-vjeçare amerikane u rrit në 2.4%, pas komenteve të shefit të Rezervës Federale, Jerome Powell, i cili e la të hapur mundësinë për rritjen e interesave edhe me 25 pikë bazë në takimin e ardhshëm, për të luftuar inflacionin e lartë.

Indeksi që mat ecurinë e dollarit amerikan përballë 6 monedhave kryesore ndërkombëtare po shfaqet i qëndrueshëm në 98.456, ndërsa euro tregtohet në rreth 1.1022 dollarë. Në anën tjetër, Paundi britanik preku nivelin më të lartë në 3 javët e fundit në raport me dollarin, në 1.3280. Në tregun e kriptovalutave, bitcoin po tregtohet në rreth 42 mijë dollarë, ndërsa ethereum në rreth 3 mijë dollarë.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.