Treguesi i ndjesisë ekonomike – Shënon nivelin më të lartë në 1 dekadë në Eurozonë
Treguesi i ndjesisë ekonomike në Eurozonë ka shënuar nivelin më të lartë në një dekadë, nxitur nga optimizmi në thuajse të gjithë sektorët e ekonomisë, tregojnë të dhënat e Komisionit Europian.
Indeksi për konsumatorin u rrit në 111.1 pikë në muajin Qershor, që është niveli më i lartë që prej Gushtit 2007.
Raporti vjen dy ditë pasi Presidenti i Bankës Qendrore Europiane, Mario Draghi, befasoi investitorët duke argumentuar se stimujt monetar mund të përshtaten nëse ekonomia përmirësohet.
Një matës i aktivitetit të sektorit privat tregoi se ekonomia e Eurozonës është fuqizuar ndjeshëm në tremujorin e dytë. Sipas analistëve të UniCredit, të dhënat do ti japin mundësinë Bankës Qendrore Europiane që të nisë tërheqjen e lehtësimit monetar. Raporti i Komisionit tregoi një përmirësim të gjerë të besimit.
Në industri, besimi u fuqizua prej vlerësimeve pozitive nga manaxherët për librat e porosive ndërsa në shërbime, optimizmi u nxit nga pritshmëritë për kërkesën.
Rritja e besimit të konsumatorit reflektoi një përmirësim të perspektivës ekonomike, punësimit në të ardhmen dhe pritshmërive për kursimet. Treguesit për Gjermaninë, Francën dhe Hollandën u rritën ndjeshëm, raporton Komisioni, ndërsa për Spanjën dhe Italinë mbetën thuajse të pandryshuara.
Të dhënat do të ndihmojnë politikëbërësit e BQE ndërkohë që përgatiten të hartojnë daljen nga masat lehtësuese monetare.
Bordi drejtues i bankës takohet më datë 20 Korrik, megjithatë, shumë ekonomistë nuk shohin ndonjë ndryshim të madh në qëndrim deri në takimin e 7 Shtatorit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.