Treguesi i ndjesisë ekonomike – Shënon rritje për të tretin muaj radhazi në Eurozonë
Treguesi i ndjesisë ekonomike në Eurozonë është rritur për të tretin muaj radhazi në Korrik, duke prekur nivelin më të lartë në 10 vite, tregojnë të dhënat e Komisionit Europian.
Treguesi në 19 vendet e valutës së përbashkët u rrit në 111.2 në Korrik, nxitur nga optimizmi në sektorin e shërbimeve.
Të dhënat konfirmuan rimëkëmbjen e fortë të Eurozonës, ndërkohë që Produkti i Brendshëm Bruto pritet të rritet me 0.5% edhe në tremujorin e dytë. Të dhënat për ekonominë e rajonit do të publikohen javën që vjen.
Pavarësisht rritjes së papritur të treguesit për ndjesinë ekonomike, indeksi për besimin e biznesit, që tregon fazën e ciklit ekonomik, ra lehtë për muajin Korrik.
Përmirësimi i ndjesisë ekonomike u nxitu kryesisht nga optimizmi në sektorin e shërbimeve, që është më i madhi në Eurozonë.
Valuta europiane u rrit me publikimin e treguesit të Komisionit Europian, duke kaluar përsëri nivelin e 1.17 kundër dollarit amerikan. Të dhënat do të ndihmojnë politikëbërësit e BQE ndërkohë që përgatiten të hartojnë daljen nga masat lehtësuese monetare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.