Tritol linjës së tensionit të lartë – Rrezikohet furnizimi me energji, OST: Po shmangim stakimin
Një prej shtyllave të linjës së tensionit të lartë 400 kv Tiranë-Podgoricë është dëmtuar si pasojë e një eksplozivi të vendosur në zonën e Fushë-Krujës. Sipas Operatorit të Sistemit të Transmetimit, nga shpërthimi është dëmtuar një nga këmbët e shtyllës, duke rrezikuar furnizimin me energji elektrike.
Sipas këtij dikasteri, aktualisht njësitë special janë duke ndërhyrë për të shmangur stakimin e linjës që do të kishte pasoja shumë të rënda në furnizimin me energji elektrike në të gjithë vendin. ”Flukset e energjisë që injektohen në këtë linjë sot janë 50% e konsumit në gjithë vendin”, thuhet ndër të tjera në njoftim. Ndërprerja e energjisë elektrike do të krijonte vështirësi tejet të mëdha , në një kohë që vendi është përfshirë nga temperaturat e ulta, ndërkohë që një pjesë shumë e madhe e familjeve përdorin energjinë elektrike për ngrohje.
Operatori i Sistemit të Transmetimit ka dënuar këtë akt të rëndë kriminal dhe ka kryer veprimet proceduriale në organet e drejtësisë me synim gjetjen e autorëve dhe vënien e tyre para përgjegjësisë.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.