Tronditen çmimet e energjisë – Thatësira godet rajonin, preket Shqipëria, Bosnja dhe Serbia
I gjithë Ballkani është pushtuar nga një thatësirë e paprecedentë dhe e tejzgjatur. Nivelet e ujërave në të gjithë rajonin kanë rënë ndjeshëm, duke shkaktuar mungesë të prekshme energjie, e për rrjedhojë edhe shtrenjtim të çmimeve të energjisë elektrike në pjesën dërrmuese të këtyre vendeve.
Prodhimi i energjisë në rajon, që prej fillimit të Korrikut është thuajse sa gjysma e niveleve të së njëjtës periudhë të një viti më parë. Temperaturat mbi 40 gradë celsius dhe mungesa e reshjeve të shiut janë shkaktarët kryesorë të kësaj situate.
Diçka e tillë ka gjeneruar një shtrenjtim të çmimeve referencë të energjisë prej thuajse 30% që prej fillim-vitit si dhe ka detyruar vendet e rajonit që të importojnë energji me çmime të fryra.
Në vende si Shqipëria, Bosnje Hercegovina dhe Serbia, energjia që prodhohet nga burimet hidrike është mjaft e rëndësishme. Në Shqipëri zë pjesën kryesore, ndërsa në Bosnje dhe Serbi fiksohet pranë 50% dhe 30%.
Vala e të nxehtit në Shqipëri, e kryesisht kërkesa e lartë për ajrin e kondicionuar ka nxitur që të importojmë rreth 80% të nevojës me një kosto prej rreth 30 milionë euro.
Të dhënat nga bursa e energjisë tregojnë se, çmimet për megavat orë të prodhuar në Serbi kanë prekur nivelin e 87.26 euro, në Kroaci atë të 104 eurove, në Hungari 57.89 euro.
Për Shqipërinë ndërkohë, çmimet e importit janë ngjitur në 55.81 euro për Megavat/orë, të paktën për kontratën e blerjes që KESH ka arritur për shtatorin, kur pritet që shirat të mungojnë. Ekspertët shprehen se, çmimet janë rritur mesatarisht 10-15 euro për Megavat/orë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.