Tronditen tregjet në Itali – Yield-i në nivelin më të lartë në 4 vite, BE kritikon buxhetin e ri
Interesat e borxhit Italian arritën nivelet më të larta në 4 vite, ndërkohë që investitorët po alarmohen për huadhënien drejt qeverisë, pas publikimit të planit për buxhetin. Yieldet e obligacioneve 10-vjeçare dhe 30-vjeçare shënuan nivelin më të lartë që prej vitit 2014, pak orë pasi Bashkimi Europian paralajmëroi për thyerjen e rregullave në buxhetin Italian.
Interesat e titujve 10-vjeçar u rritën në 3.74%, ndërsa indeksi i titujve të kapitalit në Milano, FTSE MIB, ra me 1% në nisje të tregtisë. Investitorët janë shqetësuar për buxhetin e vitit 2019 të Italisë, që është dërguar këtë javë në Bruksel për analizë.
Partitë populiste planifikojnë rritjen e shpenzimeve publike, duke mbajtur premtimet e dhëna në zgjedhjet e muajit Mars. Ekzistojnë shqetësime se plani fiskal do të përkeqësojë nivelin e borxhit, që është i dytë më i madh në Eurozonë prej 2.3 trilionë euro.
Në Europë, vendet nuk duhet të arrijnë një deficit publik prej më shumë se 3% të PBB. Megjithatë, në rastin e Italisë, ku borxhi qëndron në mbi 130% të Produktit të Brendshëm Bruto, Brukseli i ka kërkuar Romës që të balancojë financat. Në fund të kësaj jave, Brukseli i dërgoi letër ministrit të Financave, Giovanni Tria, duke e paralajmëruar se buxheti i vitit 2019, shkel rregullat europiane.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.