Trump: “BE është krijuar për të përfituar nga SHBA, nuk na kanë trajtuar asnjëherë mirë”

Presidenti amerikan Donald Trump tha se “Bashkimi Evropian u formua në mënyrë që të përfitonte nga Shtetet e Bashkuara” ndërsa pretendoi se aleatët evropianë të Shteteve të Bashkuara “kurrë nuk na kanë trajtuar mirë”.

Komentet e Presidentit Trump erdhën gjatë një fjalimi të gjatë që përfshin një seri temash në një konferencë për shtyp në Kopshtin e Trëndafilave të Shtëpisë së Bardhë.

Konferenca ishte planifikuar si një njoftim i veprimeve të reja ndaj Kinës, por Trump në vend të kësaj foli për më shumë se një orë për shpenzimet ushtarake, imigracionin e paligjshëm, miqësinë e tij me presidentin e Meksikës, si dhe sulmoi Joe Biden.

Kur u kthye të flasë për Evropën, ai tha: “Mos harroni se ne jemi në konkurrencë me Kinën, dhe me shumë vende të tjera në të gjithë botën. Ne jemi në një konkurrencë të jashtëzakonshme ekonomike, përfshirë Evropën, e cila kurrë nuk na ka trajtuar mirë “.

Origjina e asaj që tani quhet Bashkimi Evropian u formua në vitin 1950, në vijim të Luftës së Dytë Botërore, kur gjashtë vende – Belgjika, Franca, Gjermania, Italia, Luksemburgu dhe Holanda – formuan Komunitetin Evropian të Qymyrit dhe Çelikut .

Organizata kishte për qëllim të promovonte lidhjet tregtare, si dhe të nxiste bashkëpunimin politik në mënyrë që t’i jepte fund konflikteve të përgjakshme evropiane që kishin karakterizuar gjysmën e parë të shekullit. Duket se Trump nuk mendon kështu.

D.B – SCAN
Burimi: Business Insider

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.