Trump flet kundër FED – Kritikon rritjen e normave të interesit pavarësisht ekonomisë së fortë
Presidenti i Shteteve të Bashkuara Donald Trump, ka kritikuar politikat e Rezervës Federale, pavarësisht se ekonomistët argumentojnë që inflacioni i lartë dhe papunësia e ulët justifikojnë rritjen e normave të interesit.
Trump tha se është i shqetësuar mbi ndikimin në ekonominë amerikane dhe konkurrueshmërinë e korporatave, nga rritja e normave të interesit dhe fuqizimit të dollarit.
“Pas çdo ndërhyrje ata kërkojnë të rrisin përsëri normën e interesit. Nuk jam i kënaqur me këtë, por do t’i lë që të bëjnë punën e tyre”, tha Trump.
Ai shtoi se valuta kineze po bie ndjeshëm dhe fuqizimi i dollarit amerikan po e vë vendin në disavantazh. Yieldi i titujve të Thesarit në SHBA, e përfundoi ditën tregtare në rënie dhe dollari amerikan ra lehtë pas komenteve të presidentit.
Pas më shumë se 6 vitesh me norma rekord të ulëta të interesit që kanë ndihmuar ekonominë amerikane të rimëkëmbet nga kriza, Rezerva Federale nisi rritjen graduale të interesave në Dhjetor të 2015-ës dhe ka bërë 5 ndërhyrje që kur Trump mori detyrën në Janar të 2017-ës.
Hera e fundit që banka rriti kostot e huamarrjes ishte Qershori dhe gjatë dëshmisë në Kongres këtë javë, kryetari i Rezervës Federale Jerome Powell, përsëriti këndvështrimin e tij se tkurrja monetare do të vazhdojë në mënyrë graduale.
Bankierët amerikanë presin 2 ndërhyrje të tjera për këtë vit dhe 3 në 2019-ën. Rritja e fortë ekonomike në SHBA dhe tkurrja monetare, ndërkohë që Banka Qendrore Europiane dhe Banka e Japonisë i mbajnë normat e interesit në nivele rekord të ulëta, ka bërë që dollari të rritet në nivelet më të larta në 1 vit.
Kjo nuk është hera e parë që Trump nuk respekton pavarësinë e Rezervës Federale, duke mos komentuar për politikat apo vlerën e dollarit amerikan.
“Po them atë që mund të thotë çdo qytetar”, tha Trump. Shtëpia e Bardhë deklaroi më vonë se Donald Trump respekton pavarësinë e Rezervës Federale dhe se nuk po ndërhynë me vendimet e politikave.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.