Trump gjen “zgjidhje” për murin – “Do e ndërtojmë me çelik meqë nuk pëlqejnë betonin”
Presidenti i Shteteve të Bashkuara, Donald Trump, premtoi se nuk do të tërhiqet nga kërkesa e tij për të ndërtuar murin, por tha se barriera mund të ndërtohet me çelik në vend të betonit, në formë kompromisi me demokratët që e refuzojnë.
Komentet e Trump vijnë ndërkohë që ka nisur java e tretë e mbylljes së Qeverisë. Trump kërcënoi përsëri se do shpallë emergjencën kombëtare si një mënyrë alternative për të ndërtuar murin, pa ofruar detaje për origjinën e financimit.
Demokratët kanë refuzuar kërkesën e Trump për 5.6 miliardë dollarë që të përmbushë premtimin e fushatës së tij për ndalimin e emigrimit të jashtëligjshëm. Me në krye Nancy Pelosi, demokratët kaluan ligjin në Parlament javën e kaluar për të rihapur qeverinë, pa përfshirë financimin e murit.
“Ata nuk e pëlqejnë betonin, kështu që do e ndërtojmë me çelik. Çeliku është edhe më i shtrenjtë se betoni, por do duket bukur dhe është i fortë. Ne po konsiderojmë emergjencën kombëtare për shkak se kemi’ emergjencë. Kemi krizë të kriminelëve dhe bandave që kalojnë kufirin.
Është siguri kombëtare, është emergjencë kombëtare.” – deklaroi Trump. Në një letër ndaj liderëve në kongres që detajonte kërkesat për financim, administrata e Trump shtoi 800 milionë dollarë për të trajtuar nevojat urgjente humanitare në kufirin jugor.
Zv/Presidenti Mike Pence mbajti një raund të dytë të bisedimeve me aleatët në kongres për çështjen ditën e diel, por Trump tha se nuk pritet ndonjë rezultat. Shtëpia e Bardhë paralajmëroi përsëri se mbyllja e Qeverisë mund të zgjasë dhe bëri të ditur se oferta për murin prej çeliku përbën një simbol paqeje për demokratët.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.